Ailəsi onun varlığını ilk əvvəl gizlətməyə çalışsa da, sonradan fikrindən döndü. Zatən belə "sirr" gizləniləsi də deyil.

Axı bu sirri necə gizlədəsən?!

O da yaşıdları kimi yaşamaq, əylənmək, sevinmək, qüssələnmək istəyir.
Yerimək, qaçmaq istəyir, amma alınmır.

BİG.AZ bildirir ki, 19 yaşlı Rəhma Haruna plastik ləyəndə yaşayır. Bu ləyən artıq illərdir ki, onun yaşam məkanıdır.

Rəhmanın sinəsindən aşağı vücudu faktiki olaraq yoxdur. Yəni onun ayaqları böyüməyib, kiçik rudimentlər, ət parçaları kimi qalıb.

Rəhma deyir ki, uşaqlıqda arzuları çox idi. O, böyüyəndə hədiyyələr dükanı açmaq istəyirdi.
"Amma arzularım elə arzu kimi qaldı. Plastik ləyəndə yaşayıram. Nə əllərim var, nə də ayaqlarım. Həyatım sürəkli, bitmək bilməyən ağrıdan ibarətdir", - Rəhma söyləyib.

Nigeriyanın Kaneo şəhərində yaşayan Rəhma Haruna sağlam uşaq kimi doğulmuşdu. Amma 6 aylıq olanda onun böyüməsi qəflətən dayandı. 6 yaşından bəri Rəhmanın vücudu inkişaf etmir.
Rəhmanın anası Fadi danışır: "Qızım 6 aylıq olanda oturmağı öyrənmişdi. Amma iməkləməyi, yeriməyi öyrənə bilmədi. Hər şey qızdırma ilə başladı. Sonra qarnı, əlləri, ayaqları ağrıdı. Onun qolları və ayaqları çox kiçikdir. Tərpədəndə dəhşətli ağrılar keçirir".

Rəhmanın 10 yaşlı qardaşı Fəhda böyük bacısını həddən artıq çox sevir.
"Bacımı çox istəyirəm. Lap çox. Onu mən çimizdirirəm, hər gün yemləyirəm. Qohumlarımız gələndə də bacım sevinir. Bacım dünyanın ən gözəl qızıdır", - Fəhda söyləyib.
Rəhmanın atası Hüseyninin dediyinə görə, 15 ildir ki, qızının dərdinə çarə arayır. O, fermasını, torpaqlarını, ey heyvanlarını satıb, müayinələrə indiyədək 1 milyon nayrdan (təqribən 4 min dollar) çox pul xərcləyib.

Amma həkimlərdən kimsə Rəhmaya dəqiq diaqnoz qoya bilməyib.
"Günlərin birində dükana getmişdik. Orada tanımadığımız insan qızıma əlil arabası aldı, sonra fotolarını çəkdi. Həmin fotolar yerli qəzetlərdə dərc olunandan sonra insanlar bizə yardım edirlər", - Rəzmanın anası Fadi söyləyib./milli.az/

---